
မြန်မာဘာသာစကားနဲ့ ရေးသားဖတ်ရှုနိုင်တဲ့ my.wikipedia.org နဲ့ ပတ်သက်တဲ့ အလုပ်ရုံဆွေးနွေးပွဲကို ထိုင်း နိုင်ငံဘန်ကောက်မြို့ရှိ St. Garbriels’s Foundation မှာအောက်တိုဘာလ ၁ ရက်နေ့ကနေ ၃ ရက်နေ့အထိ ကျင်းပခဲ့ပါ တယ်။ အဆိုပါ အလုပ်ရုံဆွေးနွေးပွဲကို မြန်မာယူနီကုဒ်ကျွမ်းကျင်သူများ၊ မြန်မာဘာသာစကားဖြင့် မြန်မာဝီကီ ရေးသားနေသူများနဲ့ နည်းပညာဆိုင်ရာ ကျွမ်းကျင်သူများ တက်ရောက်ခဲ့ကြပါတယ်။ အဆိုပါ အလုပ်ရုံဆွေးနွေးပွဲ Wikipedia တွင် မြန်မာဘာသာစကားဖြင့် ရေးသားထားသည့် ပညာရပ်ဆိုင်ရာအကြောင်းအရာများ၊ မြန်မာ့ယဉ်ကျေး မှုဆိုင်ရာအကြောင်းအရာများ၊ ဒေသဆိုင်ရာအကြောင်းအရာများ၊ ထင်ပေါ်ကျော်ကြားသူများရဲ့ အကြောင်းအရာ များ၊ နည်းပညာဆိုင်ရာအကြောင်းအရာများ၊ အများပြည်သူအတွက် အကျိုးများစေမည့် အကြောင်းအရာများနဲ့ အသိပညာဗဟုသုတရရှိနိုင်သည့် အကြောင်းအရာများကို လက်ရှိအခြေအနေထက် ပိုမိုဖတ်ရှုလေ့လာနိုင်စေရန်၊ ပိုမိုပါဝင်ရေးသားလာစေရန် ဦးတည်ပြီးဆွေးနွေးတဲ့ အလုပ်ရုံဆွေးနွေးပွဲ ဖြစ်ပါတယ်။
ဆွေးနွေးခဲ့ကြတဲ့ အကြောင်းအရာများ
ဖော်ပြပါ အလုပ်ရုံဆွေးနွေးပွဲမှာ မြန်မာယူနီကုဒ်နဲ့ ပတ်သက်တဲ့ အကြောင်းအရာများ အပါအဝင် မြန်မာဝီကီ တိုးတက်ပြန့်ပွားရေး၊ တိုင်းရင်းသားဘာသာစကားများဖြစ်သည့် ရှမ်း၊ မွန်၊ ကရင်တို့ဖြင့် ဝီကီတွင် ရေးသားနိုင်ရေး၊ မြန်မာဝီကီတွင် ဖတ်ရှုနိုင်မည့် အကြောင်းအရာများ တိုးပွားများပြားလာရေး၊ မြန်မာဝီကီရေးသားသူများပြားလာ ရေးနဲ့ မြန်မာလိုကယ်လိုက်ဇေးရှင်းဆိုင်ရာ အကြောင်းအရာများကို ဆွေးနွေးအဖြေရှာခဲ့ကြပါတယ်။ ထို့အပြင် မြန်မာဝီကီပီးဒီးယာဖွံ့ဖြိုးတိုးတက်ရေးအတွက် လိုအပ်နိုင်မည့်အချက်အလက်နဲ့ မြန်မာဝီကီတိုးတက်ရေးအတွက် လိုအပ်သည့် ပြင်ဆင်မှုများ ပြုလုပ်နိုင်ရန်လည်းတိုင်ပင် ဆွေးနွေးခဲ့ကြပါတယ်။
ဝီကီပီးဒီးယာဆိုတာ
Wikipedia ဆိုသည်မှာ Wiki နှင့် Encyclopedia နှစ်မျိုးကို ပေါင်းပြီးခေါ်ဆိုတဲ့ အွန်လိုင်းစွယ်စုံကျမ်းတစ်ခု ဖြစ်ပါတယ်။ ဝီကီကို ဘာသာစကားမျိုးစုံဖြင့် ဖတ်ရှုနိုင်ပြီး လွတ်လပ်ပွင့်လင်းစွာနဲ့ အကြောင်းအရာမှန်သမျှကို ဖွင့်ပေးထားတဲ့ အွန်လိုင်းစာမျက်နှာတစ်ခုလည်း ဖြစ်ပါတယ်။ ဝီကီကို အစိုးရမဟုတ်တဲ့ အဖွဲ့အစည်းတစ်ခုဖြစ်တဲ့ ဝီကီမီဒီယာ ဖောင်ဒေးရှင်းက ထူထောင်ထားခြင်း ဖြစ်ပါတယ်။ ၂၀ဝ၁ ခုနှစ်မှာ ဂျင်မီဝေးလ်စ်နဲ့ လာရီဆန်းဂါးတို့ဟာ ဝီကီပီးဒီးယာကို စတင်လွင့်တင်ခဲ့ပြီး ယခုကာလမှာ ဘာသာစကားမျိုးစုံနဲ့ ကိုးကားနိုင်တဲ့ အွန်လိုင်းစွယ်စုံကျမ်း တစ်ခုအဖြစ် ရပ်တည်နေပါတယ်။
မြန်မာဝီကီပီးဒီးယာ
မြန်မာဘာသာစကားနဲ့ဖတ်ရှုရေးသားနိုင်တဲ့ မြန်မာဝီကီပီးဒီးယာကို my.wikipedia.org အဖြစ် တွေ့မြင်ရပါတယ်။ အ ဆိုပါ မြန်မာဘာသာစကားနဲ့ဝီကီကို ၂၀ဝ၅ ခုနှစ်မှ စတင်ခဲ့ပြီး ဝီကီမီဒီယာဖောင်ဒေးရှင်းရဲ့ အစီအစဉ်တစ်ရပ်ဖြစ် တယ်လို့ သိခဲ့ရတယ်။ ၂၀ဝ၈ ခုနှစ် ဇူလိုင်လ ၅ ရက်နေ့က မြန်မာအင်ဖိုတက် အခန်းအမှတ် ၂၀၅ မှာ my.wikipedia.org အသုံးပြုသူများ တွေ့ဆုံပွဲကို ကျင်းပခဲ့ပါတယ်။ အဆိုပါ အခမ်းအနားမှာ မြန်မာဘာသာစကားနဲ့ ဆောင်းပါးများ ရေးသားမှုအပိုင်းဟာ အိမ်နီးချင်းနိုင်ငံများထက် နှိုင်းယှဉ်ရင် အလွန်အမင်းနည်းပါးနေသေး ကြောင်း အိုင်တီပညာရှင်များက ပြောကြားခဲ့ပါတယ်။ ၂၀ဝ၈ ခုနှစ် ဇူလိုင်လအတွင်းမှာပင် မြန်မာဘာသာစကားနဲ့ အသုံးပြုနိုင်တဲ့ myanmarwikipedia.org ဆိုတဲ့ အွန်လိုင်းစာမျက်နှာတစ်ခု ထပ်မံလွင့်တင်ခဲ့တာကို တွေ့ရပါတယ်။ myanmarwikipedia.org ဟာ ဝီကီမီဒီယာဖောင်ဒေးရှင်းနဲ့ဆက်စပ်မှုမရှိပဲ မြန်မာကွန်ပျူတာအသုံးပြုသူများကို အသိ ပညာရပ်များမျှဝေလိုတဲ့ လူငယ်အိုင်တီပညာရှင်များရဲ့ ကြိုးပမ်းမှုတစ်ရပ်လို့ သိခဲ့ရတယ်။
မြန်မာဝီကီမှာသုံးတဲ့ မြန်မာဖောင့်
my.wikipedia.org ဟာ ယူနီကုဒ်စံနှုန်းကို အတိအကျလိုက်နာတဲ့ ဖောင့်များကိုသာ လက်ခံပါတယ်။ ဒါဟာလည်း ဝီကီပီးဒီးယာရဲ့ပေါ်လစီတစ်ခုဖြစ်ပြီး ယူနီကုဒ်စံနှုန်း ကိုက်ညီတဲ့ ဖောင့်နဲ့ ယူနီကုဒ်စံနှုန်းကိုက်ညီမှုမရှိတဲ့ ဖောင့်တို့ ရှိခဲ့ရင် ယူနီကုဒ်စံနှုန်းကိုက်ညီတဲ့ ဖောင့်ကိုသာ ဦးစားပေးတယ်လို့ သိရပါတယ်။ ယူနီကုဒ်စံနှုန်းကိုက်ညီတဲ့ ဖောင့်ဆိုသည်မှာ ဖောင့်များကို နာမည်များပေးပြီး ခေါ်ဆိုနေကြတဲ့ ဖောင့်နာမည် သို့မဟုတ် ဖောင့်ပုံစံများကို ဆိုလိုရင်း မဟုတ်ပဲ။ ယူနီကုဒ်စံနှုန်းကို အတိ အကျလိုက်နာထားတဲ့ မည်သည့်ဖောင့်ကိုမဆို အသုံးပြုနိုင်ခြင်းကို ဆိုလိုပါတယ်။ myanmarwikipedia.org ဟာ ဇော်ဂျီမြန်မာဖောင့်ကို အသုံးပြုခဲ့ပြီး ယင်းစာရိုက်စနစ်ကို အသုံးပြုရခြင်းဟာ လက်ရှိ ကွန်ပျူတာအသုံးပြုသူများနှင့်ကိုက်ညီတဲ့ စနစ်ကို အသုံးပြုထားကြောင်း၊ ကွန်ပျူတာအသုံးပြုသူများဟာ စာရိုက်စနစ်ကို ပြောင်းလဲအသုံးပြုလာပါက အသုံးပြုသူများ အဆင်ပြေစေရန် အများအသုံးပြုတဲ့စနစ်သို့ ပြောင်းလဲသွားမယ်လို့ ယင်းအွန်လိုင်းစာမျက်နှာကို စတင်လွင့်တင်ချိန်က တည်ထောင်သူများတွင် ပါဝင်ခဲ့သူတစ်ဦးက ပြောကြားခဲ့ပါတယ်။
မြန်မာဝီကီနှစ်ခု ရှိနေတယ်
လက်ရှိကာလမှာ မြန်မာဝီကီကို အွန်လိုင်းစာမျက်နှာနှစ်ခုအဖြစ် မြင်တွေ့ရနိုင်ပါတယ်။ ဝီကီမီဒီယာဖောင်ဒေးရှင်းရဲ့ မြန်မာဝီကီကို my.wikipedia.org အဖြစ် မြင်တွေ့ရပါတယ်။ မြန်မာအိုင်တီလူငယ်များ လွင့်တင်ခဲ့တဲ့ မြန်မာဝီကီကို ယခင်က myanmarwikipedia.org အဖြစ် မြင်တွေ့ခဲ့ရပြီး ယခုအခါ wikimyanmar.co.cc အဖြစ်မြင်တွေ့ရပါတယ်။ လက်ရှိကာလမှာ ဝီကီရေးသားနေသူ တစ်ချို့ဟာ my.wikipedia တွင် ရေးသားနေသကဲ့သို့ wikimyanmar.co.cc တွင် လည်း ရေးသားနေကြသည်ကို သိခဲ့ရပါတယ်။ ထို့အပြင် wikimyanmar.co.cc တွင် ရေးသားပြီးသာ အကြောင်းအရာ များဟာ my.wikipedia.org တွင် မရှိသေးပါက ယင်းအကြောင်းအရာနဲ့ပတ်သက်တဲ့ ဆောင်းပါးများကို ယူနီကုဒ်စံနှုန်း အတိုင်းလိုက်နာထားတဲ့ ဖောင့်အဖြစ်သို့ ပြောင်းလဲပြီး my.wikipedia တွင် လွင့်တင်ပေးနေသည်ကိုလည်း သိရပါတယ်။
ဝီကီမီဒီယာက အွန်လိုင်းလိပ်စာဟာ mm မဖြစ်ပဲ ဘာကြောင့် my ဖြစ်နေရသလဲ
အင်တာနက်စာမျက်နှာများရဲ့လိပ်စာများကို မြန်မာကိုယ်စားပြုအနေနဲ့ အသုံးပြုရာတွင် .com.mm အဖြစ် အများစုတွေ့ရပြီး mm ဟာ မြန်မာနိုင်ငံကို ကိုယ်စားပြုတဲ့ အမှတ်အသားဖြစ်တယ်။ mm ဟာ မြန်မာနိုင်ငံကို ကိုယ်စားပြုသော်လည်း မြန်မာဘာသာနဲ့ ဝီကီပီးဒီးယာတွင် mm ဟု မတွေ့ရပဲ my ဟုသာ တွေ့မြင်ရပါတယ်။ ယင်းသို့ တွေ့မြင်ရခြင်းဟာ ဝီကီပီးဒီးယာသည် နိုင်ငံများကို ကိုယ်စားပြုခြင်းမဟုတ်ပဲ ဘာသာစကားကိုသာ ကိုယ်စားပြုခြင်းကြောင့်ဖြစ်တယ်လို့ သိရပါတယ်။ ISO 639-1 စံနှုန်းသတ်မှတ်ချက်အရ မြန်မာဘာသာစကားရဲ့ ကုဒ်ဟာ my ဖြစ်တယ်လို့ သိရပါတယ်။
ဝီကီရေးသားတဲ့ အခါ
ဝီကီရေးသားတဲ့သဘာဝကို လေ့လာကြည့်တဲ့အခါ ဝီကီရေးသားခြင်းဟာ အကြောင်းအရာနဲ့ အချက်အလက်တိကျ မှု အပေါ်မှာအဓိကမူတည်ကြောင်း တနည်းအားဖြင့် စွယ်စုံကျမ်းရေးသားတဲ့ ပုံစံကိုသာ အားပြုကြောင်းတွေ့ရပါ တယ်။ ယင်းကြောင့် ဝီကီရေးသားရာတွင် အကြောင်းအရာနဲ့အချက်အလက်များကိုသာ ရေးသားရပြီး ရေးသား သူ၏ ထင်မြင်ယူဆချက်များ၊ အာဘော်များ၊ မှန်းဆချက်များ၊ အတွေးအမြင်များနဲ့ မှတ်ချက်များကို ရေးသားဖို့ မတင့်တော်ပါဘူး။ ထို့အပြင် မြန်မာဘာသာဖြင့် ဝီကီကို ရေးသားပေးခြင်းဟာ အခြားသူများ မသိနိုင်တဲ့ သတင်းအချက်များကို သိစေနိုင်ပြီး ယနေ့ခေတ်လူငယ်များ၊ ပညာရှင်များမှ မိမိတို့ မသိမီခဲ့တဲ့ ခေတ်ကာလက လူပုဂ္ဂိုလ်များ၊ အခြေအနေအကြောင်းအရာများကို သိရှိနိုင်ပါတယ်။ ရေးသားသူတစ်ဦးရဲ့ ရေးသားတင်ပြမှု ကွဲလွဲမှားယွင်းချက်များကို တစ်ခြားတစ်ဦးမှ အမှန်သို့ရောက်အောင် ဝင်ရောက်ပြီး ပြင်ဆင်ပေးနိုင်ပါတယ်။ ဝီကီရေးသားသူရဲ့ ဆောင်းပါးများဟာ မျှတမှန်ကန်ပြီး တစ်ဖက်စွန်းကို မရောက်ပါက အကြိမ်ကြိမ် ပြင်ဆင်ရန် မလိုအပ်ကြောင်းလည်း သိရပါတယ်။
မူပိုင်ခွင့်ဆိုင်ရာ ကိစ္စများ
ဝီကီပီးဒီးယာတွင် ဆောင်းပါးများ ရေးသားသည် ဖြစ်စေ၊ ဝီကီပီးဒီးယာမှ အကြောင်းအရာများကို ကိုးကား အသုံးပြုသည် ဖြစ်စေ။ ဝီကီပီးဒီးယာသည် ယင်းနဲ့ပတ်သက်ပြီး မူပိုင်ခွင့်များကို ကာကွယ်ထားခြင်းမရှိပါ။ (ချွင်းချက်။ ။ ဝီကီပီးဒီးယာတွင်ရှိသည့် အကြောင်းအရာနဲ့ ဆောင်းပါးများကို တစုံတခုတွင် အသုံးပြုရာတွင် မူပိုင်ခွင့်အရ ကာကွယ်ထားခြင်း မရှိသော်လည်း wikinews နဲ့ပတ်သက်တဲ့ ကိစ္စများတွင် မူပိုင်ခွင့်ဆိုင်ရာကာကွယ် ပေးထားခြင်းများ ရှိတယ်လို့ သိရတယ်။) ယင်းကဲ့သို့ မူပိုင်ခွင့်နဲ့ပတ်သက်ပြီး ကာကွယ်ထားခြင်းမရှိတဲ့အတွက် ဝီကီရေးသားသူများဟာ မူပိုင်ခွင့်ဆိုင်ရာကင်းလွတ်တဲ့ အကြောင်းအရာများကို ရေးသားသင့်တယ်လို့ သိရပြီး မူပိုင်ခွင့်နဲ့ ကာကွယ်ထားတဲ့ ရသစာပေများ၊ ဓာတ်ပုံများနဲ့ အခြားသော ဆက်စပ်အကြောင်းအရာများကို ရေးသား ရန် မသင့်ကြောင်း သိရပါတယ်။ ထို့အပြင် ဝီကီရေးသားရာတွင် မိမိရေးသားချက်နဲ့ ပတ်သက်ပြီး မိမိရေးသားမှုများကို တစ်ပါးသော သူများက ဝင်ရောက် ပြင်ဆင်ခွင့်ရှိသည်ကို တွေ့ရပါတယ်။ ဝီကီရေးသားခြင်းဟာ အကြောင်းအရာတစ်ခုကို မိမိတစ်ဦးတည်းမှ ရေးသားတဲ့ ပုံစံမဟုတ်ပဲ။ ယင်းအကြောင်းအရာနဲ့ ပတ်သက်ပြီး သိရှိသူ အားလုံးက အချက် အလက်ပိုမိုစုံလင်စေရန်၊ ပိုမိုတိကျစေရန် ဝင်ရောက်ပြင်ဆင်ပေးပြီး ဝိုင်းဝန်းရေးသာကြတဲ့ ပုံစံဖြစ်ပါတယ်။ ယင်းသို့ ရေးသားရာတွင်လည်း အကြောင်းအရာတစ်ခုနဲ့ ပတ်သက်ပြီး မှန်ကန်တိကျမှုကို အချင်းချင်းဆွေးနွေး တိုင်ပင်နိုင်ပါတယ်။ ဝီကီပီးဒီးယာတွင် မူပိုင်ခွင့်နဲ့ကာကွယ်ထားတဲ့ အကြောင်းများ အကြောင်းအမျိုးမျိုးနဲ့ ရောက်ရှိလာပါကလည်း ဝီကီပီးဒီးယာမှာရှိတဲ့ SYSOP(Wiki Administrator)များက ယင်းအကြောင်းအရာများကို လွင့်တင်ထားပေးခြင်းမရှိပဲ ဝီကီပီးဒီးယာမှ ဖျက်ပစ်လိုက်နိုင်တယ်လို့ သိရပါတယ်။
မြန်မာဝီကီ လက်ရှိအခြေအနေ
မြန်မာဝီကီမှာ လက်ရှိကာလတွင် အကြောင်းအရာ သုံးထောင် ဝန်းကျင်ခံသာရှိနေပြီး လာရောက်ဖတ်ရှုသူ၊ ပါဝင်ရေးသားသူနဲ့ အကြောင်းအရာ အင်အားဟာ အလွန်ကို နည်းပါး နေပါတယ်။ အခြားသော ဘာသာစကားများနဲ့ ရေးသားထားတဲ့ ဝီကီများကို လေ့လာကြည့်ရာတွင် အင်္ဂလိပ်ဘာသာစကားနဲ့ ရေးသား ထားတဲ့ အကြောင်းအရာ ၃ သန်း၊ ဒတ်ချ်ဘာသာစကားနဲ့ ရေးသားထားတဲ့ အကြောင်းအရာ ၁ သန်း၊ ပြင်သစ်ဘာသာစကားနဲ့ ရေးသားထားတဲ့ အကြောင်းအရာ ၉ သိန်းကျော်၊ ပေါ်တူဂီဘာသာစကားနဲ့ ရေးသားထားတဲ့ အကြောင်းအရာ ၅ သိန်းကျော်နဲ့ နယ်သာလန်ဘာသာစကားနဲ့ ရေးသားထားတဲ့ အကြောင်းအရာ ၆ သိန်းကျော်ရှိနေတာကို တွေ့ရပါတယ်။ ထို့အပြင် အိမ်နီးချင်းနိုင်ငံဖြစ်တဲ့ ထိုင်းနိုင်ငံဟာ အကြောင်းအရာ ၅ သောင်းကျော်ကို ရေးသားထားပြီး ဗီယက်နမ်နဲ့ တရုတ်နိုင်ငံတို့ဟာ ၁ သိန်းအထက်ရှိနေပြီး မလေးရှားနိုင်ငံဟာ အကြောင်းအရာ ၂ သောင်းကျော် ရေးသားထားနိုင်တာကို တွေ့ရပါတယ်။
အလုပ်ရုံဆွေးနွေးပွဲ တိုင်ပင်ကြတာက
မြန်မာဝီကီနဲ့ ပတ်သက်တဲ့ အလုပ်ရုံဆွေးနွေးပွဲကို တက်ရောက်လာသူတွေဟာ အလုပ်ရုံဆွေးနွေးပွဲမှာ ဝီကီနည်း ပညာများအကြောင်းအပါအဝင် မြန်မာဝီကီကို လူအများပိုမိုသိရှိလာစေရန်၊ မြန်မာဝီကီကို အိုင်တီကျွမ်းကျင်သူများ အပြင် ဘာသာရပ်ဆိုင်ရာကျွမ်းကျင်သူများပါ ရေးသားပါဝင်လာစေရန်နဲ့ မြန်မာဝီကီဟာ အသိပညာဗဟုသုတ စုံလင်တဲ့ အွန်လိုင်းစွယ်စုံကျမ်းတစ်ခုအဖြစ် ရောက်ရှိလာစေဖို့ ကြိုးပမ်းနိုင်မယ့် နည်းလမ်းတွေကို ဝိုင်းဝန်းဆွေးနွေး တိုင်ပင်ကြပါတယ်။ ယင်းသို့ တိုင်ပင်ဆွေးနွေးကြရာတွင် သတင်းစာနဲ့ စာနယ်ဇင်းများမှာနေ၍ လူအများ စိတ်ဝင်စားတဲ့ အကြောင်းအရာများကို ရှာဖွေ၍ မြန်မာဝီကီတွင် ရေးသားပေးထားရန်၊ လူအများ စိတ်ဝင်စားနိုင်တဲ့ ဘောလုံးအားကစားအကြောင်း၊ ထင်ပေါ်ကျော်ကြားတဲ့ ရုပ်ရှင်သရုပ်ဆောင်၊ အဆိုတော်များအကြောင်းစတဲ့ အချက်အလက်များကို အချိန်နဲ့တစ်ပြေးညီ ရေးသားလွင့်တင်ပေးထားသင့်ကြောင်း ဆွေးနွေးကြပါတယ်။ ထို့အပြင် ဝီကီရေးသားသူများကို ပျော်ရွှင်စရာမှုရရှိစေရန် ဖန်တီးပေးခြင်း၊ ဝီကီရေးသားသူများ တွေ့ဆုံနိုင်ခွင့်ပေးခြင်း၊ ပြိုင်ပွဲများ ပြုလုပ်ပေးခြင်းနဲ့ ပါဝင်ရေးသားသူများကို အသိအမှတ်ပြုပေးခြင်းတို့ကို ပြုလုပ်ပေးရန်လည်း ဆွေးနွေးကြပါတယ်။ ထို့အပြင် အင်တာနက်ဆိုင်များတွင် ဝီကီရေးသားနိုင်ရန်၊ ဖတ်ရှုနိုင်ရန် စီစဉ်ပေးခြင်းနဲ့ ဝီကီရေးသားရာတွင်လိုအပ်တဲ့ နည်းပညာပံ့ပိုးမှုများပေးနိုင်ရန် စီစဉ်ပေးနိုင်ရေးတို့ကိုလည်း ဆွေးနွေးကြပါတယ်။
Myanmar Wikipedia Working Group
အလုပ်ရုံဆွေးနွေးပွဲကို တက်ရောက်လာကြတဲ့သူများဟာ မြန်မာဝီကီဖွံ့ဖြိုးတိုးတက်ရေးအတွက် Myanmar Wikipedia Working Group အဖြစ် Technical Team, Promotion Team, Editorial Team လို့ အုပ်စုငယ်များခွဲပြီး Action Plan များကို စီစဉ် ခဲ့ကြပါတယ်။ ယင်းသို့ စီစဉ်ခဲ့တဲ့ ရလာဒ်အရ Myanmar Wikipedia Working Group ဟာ လာမယ့် ၂၀၁၁ ခုနှစ် ဇူလိုင်လ မှာ အကြောင်းအရာ စုစုပေါင်း ၁၅၀ဝ၀နဲ့အထက် ရှိနေရန် ပန်းတိုင်တစ်ခု ထားရှိနိုင်ခဲ့ပြီး ယင်းကာလမတိုင်မီ ကြားကာလများတွင် မြန်မာဝီကီပီးဒီးယာဖွံ့ဖြိုးရေးလုပ်ငန်းများကို လုပ်ဆောင်နိုင်ရန် စီစဉ်ခဲ့ကြတယ်။
မြန်မာအတွက် မြန်မာဝီကီ
မြန်မာဘာသာစကားနဲ့ ဝီကီမှာ မြန်မာနဲ့ပတ်သက်တဲ့ အကြောင်းအရာတွေကို ဖြည့်ဆည်းပေးနိုင်ဖို့ဆိုတာ မြန်မာ ဘာသာစကားတတ်ကျွမ်းတဲ့ မြန်မာများသာ တတ်နိုင်ပါတယ်။ မြန်မာဝီကီပီးဒီးယားကို မြန်မာလူမျိုးတိုင်းက ပိုင်ဆိုင်ပါတယ်။ မြန်မာလူမျိုးတိုင်းက မြန်မာဝီကီတိုးတက်ဖို့အတွက် လုပ်နိုင်ပါတယ်။ မြန်မာဝီကီမှာ အားကိုး လောက်တဲ့ အကြောင်းအရာတွေ ရှိနေခြင်းဟာလည်း မြန်မာတို့အတွက် ဂုဏ်ယူစရာတစ်ခုဖြစ်သလို နောက်လာမယ့် မျိုးဆက်သစ်တွေအတွက် ပေးအပ်ခဲ့နိုင်တဲ့ အမွေကောင်းတစ်ခုလည်း ဖြစ်ပါတယ်။ မြန်မာဝီကီတိုးတက်မှုကို မြန်မာတွေပဲ လုပ်နိုင်ပါတယ်။
မြန်မာဝီကီပီးဒီးယာကို သူတို့က ဒီလိုပြောတယ်
ကိုငွေထွန်း
မြန်မာဝီကီ ဖွံ့ဖြိုးတိုးတက်ဖို့အတွက် ကန့်သတ်မှုတွေ မရှိပါဘူး။ မြန်မာဝီကီကို စိတ်ဝင်စားသူတွေက လာကြမယ်။ သူတို့ လုပ်နိုင်တာကို လုပ်ပြီး ပြန်ထွက်သွားကြမယ်။ မြန်မာဝီကီကတော့ အမြဲတမ်း ရှင်သန်နေနိုင်မယ်။
ကိုဇော်သက်အောင်
မြန်မာစာတတ်ပြီး အင်္ဂလိပ်စာမတတ်တဲ့ လူတစ်ယောက်အတွက် ဗဟုသုတရှာဖို့ အဟန့်အတားဖြစ်မနေစေချင်ဘူး။ မြန်မာလိုပဲ ဗဟုသုတကို ပထမဆုံးခြေလှမ်းအနေနဲ့ ရစေချင်ပါတယ်။ (ဘာသာရပ်တစ်ခုကို)တကယ်နက်နက်နဲနဲ လိုက်စားခဲ့ရင်တော့ နိုင်ငံခြားဘာသာစကားတတ်ဖို့ လိုကောင်းလိုနိုင်ပါတယ်။ ပထမခြေလှမ်းအနေနဲ့ ဝီကီမှာ အကြောင်းအရာတစ်ခုကို မြန်မာလို ရှာနိုင်မယ်ဆိုရင် ဝီကီက အကျိုးပြုပေးတဲ့ အချက်တစ်ခုပဲ။ ဝီကီဆိုတာက တစ်ယောက်ထဲ လုပ်လို့ဖြစ်တဲ့ အလုပ်မဟုတ်ဘူး။ အားလုံးစုပေါင်းပြီး လုပ်ရတဲ့ အလုပ်ဖြစ်တယ်။ လူတွေ အားလုံးရဲ့ ဗဟုသုတတွေ တစ်နေရာထဲမှာ စုစည်းထားတဲ့ သဘောပဲ။ ကိုယ့်မှာ ရှိတဲ့ ဗဟုသုတကို သူများကို ပေးလိုက်လို့ ကိုယ့်မှာ လျှော့သွားတာ မဟုတ်ဘူး။
Keith Stribley
မြန်မာဝီကီရှိတာ မြန်မာတွေအတွက် အရမ်းကောင်းတယ်။ မြန်မာတွေ အများကြီးပါဝင်ခဲ့ရင် မြန်မာဝီကီ ပြီးပို ကောင်းလာမယ်။
Mayor mt
အင်တာနက်ကို လွယ်လွယ်ကူကူ အသုံးချရတဲ့ အခွင့်အရေး ကျွန်တော့မှာ ရှိပါတယ်။ စာဖတ်တဲ့အပိုင်းကိုလည်း ဝါသနာပါတယ်။ စာဖတ်တော့ ဗဟုသုတရတယ်။ ကျွန်တော်ရတဲ့ ဗဟုသုတကို အများအတွက် မျှဝေတဲ့ သဘောနဲ့ ဝီကီကို ရေးဖြစ်ပါတယ်။ တစ်ခြားနိုင်ငံမှာ ရှိနေကြတဲ့ သူတွေက ကျွန်တော်ရေးတဲ့ ဆောင်းပါးတွေကို သဘောကျ ကြတယ်။ ထပ်ရေးဖို့လည်း တိုက်တွန်းကြတယ်။ ဒီအတွက်လည်း ပီတိဖြစ်မိတယ်။ ဝီကီရေးရင်နဲ့ သဘောပေါက် လာတာက မြန်မာတွေအားလုံးအတွက် မြန်မာဝီကီဆိုတာ နိုင်ငံခြားသားတွေ ရေးလို့မဖြစ်ဘူး။ ကျွန်တော်တို့ မြန်မာလူမျိုးတွေသာ ရေးမှ ပြီးပြည့်စုံမယ်၊ မှန်ကန်မယ်။ မြန်မာတွေ ဝီကီမှာ ဝိုင်းရေးပေးကြမယ်ဆို မြန်မာဝီကီ ဟာ ဒီထက် တိုးတက်လာပါမယ်။
လဂွန်းအိမ်
မြန်မာဝီကီရေးတဲ့အတွက် အချိန်လည်း ပေးရတယ်။ အင်တာနက် အသုံးပြုခလည်း ပေးရတယ်။ လာမယ့် ကျွန် တော်တို့ရဲ့ မျိုးဆက်တွေအတွက် ဖွံ့ဖြိုးတိုးတက်မှုတစ်ခုကို အစပြုပေး စေချင်တယ်။ မရှိမဖြစ် လိုအပ်လာမယ့် အရာတွေလို့လည်း မြင်မိတယ်။ ဝီကီစရေးတဲ့ အချိန်တုန်းက တစ်နေကုန် ထိုင်ရေးဖြစ်တယ်။ နောက်ပိုင်း မလုပ်နိုင်တော့တဲ့ အခါကျတော့ ညပိုင်းကျမှ လုပ်ဖြစ်တယ်။ တစ်နေ့ နှစ်နာရီလောက် လုပ်ဖြစ်ပါတယ်။ ဝီကီကို တစ်ယောက်ယောက်က ဝင်ဖတ်ပြီး မှားတယ်၊ မှန်တယ် ထောက်ပြဝေဖန်ရင် တအားဝမ်းသာတယ်။ သူတို့အတွက် အကျိုးရှိပါတယ် ပြောလာရင်လည်း ဝမ်းသာတယ်။ နေရာဒေသအသီးသီးမှာ ရှိနေတဲ့ မြန်မာများအနေနဲ့ မြန် မာဝီကီတိုးတက်ဖို့ ဝိုင်းဝန်းပူးပေါင်းပေးပါလို့ မေတ္တာရပ်ခံချင်ပါတယ်။
ဟန်ဇော်
၂၀၁၀ ပြည့်နှစ် နိုဝင်ဘာလထုတ် ပါစင်နယ်ကွန်ပျူတာမဂ္ဂဇင်းတွင် ဖော်ပြခဲ့သည်။