ပါးလ် ဆိုက်ဒမ်စတွစ်ကာ ဘတ်ခ် ဆိုသူမှာ

ပါးလ် ဆိုက်ဒမ်စတွစ်ကာ ဘတ်ခ်(Pearl Sydenstricker Buck) ဆိုသူမှာ အမေရိကန်နိုင်ငံသူ စာရေးဆရာမတစ်ဦးသည်။ စာပေဆိုင်ရာနိုဘယ်ဆုကို ရရှိထားသူဖြစ်ပြီး တရုတ်နိုင်ငံတွင် နှစ်ပေါင်းများစွာနေထိုင်ခဲ့သူဖြစ်သည်။

၁၈၉၂ ခုနှစ် ဇွန် ၂၆ ရက်တွင် ဘတ်ခ် ကို အနောက်ဗာဂျီးနီးယား၌ မွေးဖွားခဲ့သည်။ မိဘများသည် ခရစ်ယာန်သာသနာပြုများ ဖြစ်သည်။ ဘတ်ခ်၏ မိဘများသည် လက်ထက်ပြီးကတည်းက တရုတ်နိုင်ငံသို့ သာသနာပြုခရီးထွက်ခဲ့ပြီး ဘတ်ခ်ကို မွေးဖွားရန်အတွက် အမေရိကသို့ ပြန်လာကြသည်။ ထိုကြောင့် ဘတ်ခ်ကို အမိမြေ အမေရိကတွင် မွေးဖွားနိုင်ခဲ့သည်။ သူမကို မွေးဖွားပြီး သုံးလအကြာတွင် မိဘများသည် တရုတ်နိုင်ငံသို့ ပြန်လည်ထွက်ခွာ ခဲ့ကြသည်။ ဘတ်ခ်၏ အစောပိုင်းဘဝကြီးပြင်းရာသည် တရုတ်နိုင်ငံဖြစ်သည်။ တက္ကသိုလ်ပညာကို အမေရိကရှိ Randolph-Macon Woman’s College မှ အောင်မြင်ခဲ့သည်။ ထိုကောလိပ်မှ ဘွဲ့ရရှိခဲ့ပြီး တရုတ်နိုင်ငံသို့ သူမပြန်လာခဲ့သည်။ ၁၉၃၄ ခုနှစ်အထိ တရုတ်နိုင်ငံတွင် သူမနေထိုင်ခဲ့သည်။

စာပေရေးသားခြင်းကို အသက် ၂၀ အရွယ်တွင် ဘတ်ခ် စတင်ခဲ့သည်။ အက်ဆေး၊ ဝတ္ထုတိုများကို သတင်းစာနှင့်မဂ္ဂဇင်းများတွင် ဖော်ပြခံခဲ့ရသည်။ သူမ၏ ပထမဆုံးဝတ္ထုမှာ East Wind, West Wind ဖြစ်ပြီး ထိုစာအုပ်သည် ၁၉၃၀ ခုနှစ်တွင် ထွက်ခဲ့သည်။ ၁၉၃၁ ခုနှစ်တွင် The Good Earth ဆိုသော လုံးချင်းဝတ္ထုစာအုပ် ထပ်မံထွက်ရှိခဲ့သည်။ ထိုစာအုပ်သည် ရောင်းအားအကောင်းဆုံး စာအုပ်တစ်အုပ်ဖြစ်ခဲ့သည်။ ထိုစာအုပ်ဖြင့် ပူလစ်ဇာဆုကို ဘတ်ခ် ရခဲ့သည်။ စာပေဆိုင်ရာနိုဘယ်ဆုကို ၁၉၃၈ ခုနှစ်တွင် ရရှိခဲ့သည်။ ၁၉၀၉ ခုနှစ်မှ ၂၀၁၃ ခုနှစ်အထိ စာပေဆိုင်ရာနိုဘယ်ဆုရရှိသူ အမျိုးသမီး ၁၃ ဦး ရှိသည်အနက် ဘတ်ခ်သည် ၄ ဦးမြောက်ဖြစ်သည်။ စာပေဆိုင်ရာနိုဘယ်ဆုရရှိသူ အမေရိကန်အမျိုးသမီး ၂ ဦးရှိသည့်အနက် ပထမဦးဆုံး စာပေနိုဘယ် ဆုရရှိသည် အမေရိကန် အမျိုးသမီးဖြစ်သည်။ ဒုတိယအမျိုးသမီးမှာ တိုနီ မော်ရီဆန် ဖြစ်သည်။

ဘတ်ခ် ၏ စာပေလက်ရာများတွင် အရှေ့တိုင်းနှင့်အနောက် တိုင်းတို့၏ ယဉ်ကျေးမှုကွာဟမှုများ၊ ယဉ်ကျေးမှုခြင်း ထိပ်တိုက်တွေ့မှုများ၊ အမျိုးသမီး အခွင့်အရေးဆိုင်ရာများ၊ လူနည်းစု လူမျိုးစုများ၊ အာရှ၏ ယဉ်ကျေးမှုဓလေ့ထုံးတမ်းများနှင့် သွေးနှောအာရှသားတို့၏ မျိုးနွယ်စုရွေးချယ်လက်ခံခြင်း များ အစရှိသည့်အကြောင်းအရာများ အများစုပါဝင်သည်ဟု သိရသည်။ ဘတ်ခ်သည် စာစုံရေးသားသူတစ်ဦးဖြစ်သည်။ သူမ၏ စာပေလက်ရာများတွင် အတ္ထုပတ္တိ၊ ကိုယ်တိုင်ရေးအတ္ထုပတ္တိ၊ လုံးချင်းဝတ္ထု၊ ဝတ္ထုတို၊ ဝတ္ထုရှည်နှင့် သုတစာပေများကိုပါ ရေးသားလေ့ရှိသည်ကို တွေ့ရသည်။ ဘတ်ခ်သည် ၁၉၇၃ ခုနှစ် မတ်လ ၆ ရက်၊ အသက် ၈၁ နှစ် အရွယ်တွင် ကွယ်လွန်ခဲ့သည်။

ဟန်ဇော်

Ref: http://www.en.wikipedia.org, http://www.nobelprize.org