ကွန်ပျူတာအနုပညာဆိုသည်မှာ

ကွန်ပျူတာအနုပညာဆိုသည်မှာ ကွန်ပျူတာကိုအသုံးပြု၍ ဖန်တီးထားသော အနုပညာလက်ရာများကို ခေါ်ဆိုသည်။ အနုပညာလက်ရာတစ်ခုကို ကွန်ပျူတာဖြင့် ဖန်တီးရာတွင် ကွန်ပျူတာကို အပြည့်အဝသော်လည်းကောင်း၊ တစ်စိတ်တစ်ပိုင်း သော်လည်းကောင်း အသုံးပြုကြသည်။ ထို့အပြင် အနုပညာလက်ရာကို တင်ဆက်ပြသရန်အတွက် ကြားခံအလွှာတစ်ခုအဖြစ် ကွန်ပျူတာကို အသုံးပြုကြသည်။ ပုံရိပ်၊ အသံ၊ အန်နီမေးရှင်း၊ ဗီဒီယို၊ စီဒီ၊ ဒီဗီဒီ၊ ဗီဒီယိုဂိမ်း၊ ဝက်ဘ်ဆိုဒ်၊ ပါဖောင့်မန်နှင့် တပ်ဆင်ခြင်းအနုပညာများကို ဖန်တီးထုတ်လုပ်ရန်နှင့်တင်ဆက်ပြသရန် ကွန်ပျူတာကို အသုံးပြုနိုင်သည်။

ကွန်ပျူတာအနုပညာသည် ၁၉၅၀ ခုနှစ်နောက်ပိုင်းကာလများမှ စတင်၍ ဖွံ့ဖြိုးလာခဲ့သည်။ ထိုကာလတွင် နိုင်ငံတကာရှိ အနုပညာရှင်များနှင့် ဒီဇိုင်းနာများသည် စက်ပစ္စည်းနှင့်အန်နာလော့ခ်ကွန်ပျူတာများကို အသုံးပြု၍ အနုပညာ လုပ်ငန်းများကို လုပ်ကိုင်လာကြသည်။

ဘင်ဂျမန် ဖရမ်စစ် လပိုးစကီး၏ အော်စီလိုလက်ရာများကို အစောဆုံး ကွန်ပျူတာအနုပညာလက်ရာအဖြစ် သတ်မှတ်ပြောဆိုကြသည်။ ထိုလက်ရာများကို ၁၉၅၀ ခုနှစ်ဝန်းကျင်တွင် ဖန်တီးခဲ့ခြင်းဖြစ်သည်။ ဘင်ဂျမန်သည် သင်္ချာပညာရှင်၊ အနုပညာရှင်နှင့် ပုံဆွဲဆရာတစ်ဦးဖြစ်သည်။ အိုင်အိုဝါတွင် ၁၉၁၄ ခုနှစ်၌ မွေးဖွား၍ ၂၀ဝ၀ ခုနှစ်တွင် ကွယ်လွန်ခဲ့သည်။ ဘင်ဂျမန်၏ အော်စီလိုလက်ရာနောက်ပိုင်းတွင် ကွန်ပျူတာအနုပညာများကို အခြားသောအနုပညာရှင်များ ကလည်း ဖန်တီးလာခဲ့ကြသည်။ ကွန်ပျူတာနည်းပညာများကို အသုံးချရန်လေ့လာသည့်အပြင် ကွန်ပျူတာပရိုဂရမ်ရေးသား နည်းကဲ့သို့ နည်းပညာဆိုင်ရာများကိုပါ အသေးစိတ်လေ့လာခဲ့ကြသည်။ အစောဆုံး ကွန်ပျူတာအနုပညာပြပွဲကို ၁၉၆၅ ခုနှစ် တွင် ပြုလုပ်နိုင်ခဲ့ကြောင်းတွေ့ရသည်။

မြန်မာနိုင်ငံတွင် ကွန်ပျူတာကို ၁၉၇၀ ခုနှစ်နှောင်းပိုင်းကာလများက ရန်ကုန်တက္ကသိုလ်အတွင်းတွင် စတင်အသုံးပြု ခဲ့သည်။ ထိုစဉ်က အသုံးပြုခဲ့သည့်ကွန်ပျူတာများသည် ယနေ့အသုံးပြုနေသော ကွန်ပျူတာများကဲ့သို့ ပေါ့ပါးသေးငယ်သော ကွန်ပျူတာများမဟုတ်ဘဲ အလွန်ကြီးမားသောကွန်ပျူတာများဖြစ်သည်။ ထိုကွန်ပျူတာကြီးများဖြင့် တက္ကသိုလ်များနှင့် အစိုးရဌာနများသို့ သင်တန်းများပို့ချပေးခဲ့သည်။ မြန်မာနိုင်ငံ၏ ပထမဆုံးကွန်ပျူတာသင်တန်းကျောင်းကို ၁၉၈၆ ခုနှစ်တွင် MCC(Myanmar Computer Company)က တည်ထောင်ခဲ့သည်။ ကွန်ပျူတာသင်တန်းများကို ပို့ချပေးခဲ့သည်။ ထို့ကြောင့် ကွန်ပျူတာဖြင့် ဒီဇိုင်းပြုလုပ်ခြင်း၊ အနုပညာဖန်တီးခြင်းကို ၁၉၉၀ ခုနှစ်နောက်ပိုင်းကာလများတွင်သာ ပြုလုပ်နိုင်ခဲ့သည်။ မြန်မာနိုင်ငံ၏ အစောဆုံးကွန်ပျူတာဂရပ်ဖစ်ပြပွဲကို ၂၀ဝ၇ ခုနှစ်တွင် ပြုလုပ်နိုင်ခဲ့သည်။ ထိုကာလအစောပိုင်းနှင့် နှောင်းပိုင်း ကာလတွင် ကွန်ပျူတာအနုပညာပြပွဲအနေဖြင့်ပြသခြင်း မတွေ့ရသေးဘဲ စိတ်ဝင်စားသူလူနည်းစုကသာ ပြုလုပ်လေ့ရှိ ကြောင်း တွေ့ရသည်။

ကွန်ပျူတာအနုပညာလက်ရာတစ်ခုဖန်တီးရန် အခြေခံအားဖြင့် ကွန်ပျူတာတစ်စုံလိုအပ်မည်ဖြစ်သည်။ ထိုကွန်ပျူ တာ၌ အနုပညာလက်ရာဖန်တီးရာတွင် အသုံးပြုနိုင်သည့် အသုံးချဆော့ဝဲလ်များလည်း လိုအပ်မည်ဖြစ်သည်။ ပုံနှိပ်ထုတ်လုပ် ရန်လိုအပ်ခဲ့ပါက ပုံနှိပ်ထုတ်လုပ်ရန် အသုံးပြုမည့် ကြားခံအလွှာတစ်ခုလိုအပ်မည်ဖြစ်သည်။ ထိုကြားခံအလွှာသည် ပုံနှိပ်စက်၊ ပုံထုတ်စက်နှင့်ဓာတ်ပုံထုတ်စက်များဖြစ်နိုင်သည်။ အန်နီးမေးရှင်းကဲ့သို့ အနုပညာလက်ရာများကို ဖန်တီးခဲ့ပါက တီဗီနှင့်ဒီဗီဒီ ပြစက်ကဲ့သို့ ကြားခံအလွှာတစ်ခု လိုအပ်မည်ဖြစ်သည်။ ကွန်ပျူတာအနုပညာဆိုသောစကားလုံးနှင့် အနုပညာအမျိုးအစား သတ်မှတ်ချက်အောက်တွင် ကွန်ပျူတာနည်းပညာကို အသုံးပြုသည့်အခြေအနေအပေါ်တွင်မူတည်၍ ဖြာထွက်လာသော အနုပညာအမျိုးအစားများစွာရှိနေပါသေးသည်။

ဟန်ဇော်

အလင်းတန်းဂျာနယ်၊ အမှတ် (၇၇၂)၊ စက်တင်ဘာ(၁၆)၊ ၂၀၁၃ ခုနှစ်